Beynəlxalq Əlillər Günü qeyd olunub
3 dekabr- Beynəlxalq Əlillər Günü ilə əlaqədar sağlamlıq imkanları məhdud, hər iki və ya bir valideynini itirmiş, eləcə də ailələrinin yaşayış səviyyəsi aşağı olan 30-a yaxın uşağın himayə olunduğu Günərzi Qayğı Mərkəzində tədbir keçirilmişdir.
Rayon İcra Hakimiyyətinin, idarə, müəssisə və təşkilat nümayəndələrinin, valideynlər və uşaqların iştirakı ilə keçirilən tədbirdə çıxış edən RİH başçısının müavini Vəfa Heydərova Beynəlxalq Əlillər gününün hər il ölkəmizdə qeyd olunduğunu və bu gün ölkəmizdə əlillərin cəmiyyətə inteqrasiyası, sağlamlıqlarının bərpası, həyat şəraitinin yaxşılaşdırılması istiqamətində ölkə prezidenti cənab İlham Əliyev tərəfindən ardıcıl tədbirlərin həyata keçirildiyini qeyd etmişdir.
Tədbirdə çıxış edənlər dövlətimizin əlillərə olan qayğısını bir daha vurğulamış, Prezident İlham Əliyevə minnətdarlıqlarını bildirmişlər.
Daha sonra qonaqlar uşaqların ifasında mahnı, şer və rəqslərdən ibarət konsert proqramını izləmişlər.
Tədbirin sonunda Mərkəzdə tərbiyə alan uşaqlara rayon İcra Hakimiyyəti tərəfindən qiymətli hədiyyələr verilmişdir.
