Torpaq çərşənbəniz mübarək
Bu gün torpaq çərşənbəsidir.
Novruz bayramının ən təntənəli mərasimləri axırıncı çərşənbədə keçirilir. Bu çərşənbə yazın gəlməsinə daha az vaxtın qaldığına işarədir. “Torpaq çərşənbəsi” hesab olunan sonuncu çərşənbə bayrama daha yaxın olduğu üçün insanlar tərəfindən xüsusi qeyd edilir. Xalq arasında “Yer çərşənbəsi”, “İlaxır çərşənbə”, “Çərşənbə-suri” adları ilə də tanınır.
Torpaq ünsürü insan yaradılışının əsasını təşkil edir. Torpaq həm türk mifologiyasından, həm də milli-mənəvi dəyərlərimizdən qaynaqlanaraq, müqəddəs hesab olunur. Hələ qədim dövrlərdən bəri insanın ən böyük andı torpaqla bağlı idi: “Torpaq haqqı” deyən sözün düzünü söylərdi. “Torpaqdan pay olmaz”, “Torpaq deyir: öldür məni dirildim səni”, “Torpaqda izi olanın süfrədə üzü olar”.
Torpaq çərşənbəsində əkinçilər əkin – biçinə başlayır. Yer şumlanır, toxum səpilir. İnanca görə, əcdadlarımız həmin çərşənbədə tarlaya çıxar, torpağı şumlayardılar, Burada məqsəd torpağı yuxudan oyatmaq və artıq əkin vaxtının yetişdiyini xəbər verməkdir.
Süfrəyə yeddi cür nemətin qoyulması müqəddəs sayılan yeddi rəqəminin uğur gətirəcəyinə işarədir. Azərbaycanın bir sıra bölgələrində İlaxır çərşənbənin “Yeddilərin bayramı” adlandırılması bununla əlaqəlidir. Son çərşənbədə süfrə bu yeddi nemətlə- su, süd, səməni, səbzə, sumaq, sarıkök, sünbüllə bəzədilir.
İlaxır çərşənbələrlə bağlı adət-ənənələr tarixən çox qədim və zəngin olmuş, lakin tədricən, zaman keçdikcə müasirləşən həyatın təsiri ilə unudulmuş, bəziləri isə başqa bir forma almışdır.
Bir ildən artıqdır ki, dünyanı bürüyən koronavirus pandemiyasına görə ölkə ərazisində kütləvi tədbirlərin keçirilməsi təxirə salınmışdır. Təəssüf ki, bu il də çərşənbələri kütləvi şəkildə qeyd edə bilmirik. Lakin dövlətimiz tərəfindən görülən qabaqlayıcı tədbirlər deməyə əsas verir ki, tezliklə bütün el bayramlarını adət-ənənələrimizə uyğun, hamılıqla qeyd edəcəyik.
Rayon rəhbərliyi İlaxır çərşənbə münasibəti ilə rayon ictimaiyyətinə xoşbəxtlik və ailə səadəti, ölkəmizə əmin-amanlıq,nurlu gələcək arzulayır.
Bayramınız mübarək!