Rayonumuzda şəhidlərimizin xatirəsi ehtiramla anılıb
Şanlı zəfərlə başa çatan Vətən müharibəsinin başlanmasından artıq 1 il ötür. Topraqlarımızın işğaldan azad edilməsi naminə canlarını qurban vermis şəhidlərimizin əziz xatərəsi xalqımız tərəfindən daim uca tutulur ehtiramla anılır . Azərbaycanın ərazi bütövlüyü uğrunda döyüşlərdə şəhidlik zirvəsinə ucalan qəhrəman Vətən övladları hər zaman sonsuz ehtirama laiqdirlər.
Anım Günü ilə bağlı tədbirlər planına uyğun olaraq rayonun müəssisə və təşkilatlarında silsilə tədbirlər keçirilmiş, rayon rəhbərliyi, dövlət qurumları, ictimaiyyət nümayəndələri , tərəfindən vətən müharibəsi şəhidlərinin ailələri mütəmadi olaraq ziyarət olunmuşdur.
Anım Günü rayonun bütün inzibati ərazi vahidlərində qeyd olunmuş, ümumrayon toplantısı isə əsaslı şəkildə yenidən qurulan “Şəhidlər xiyabanı”nda keçirilmişdir.
Tədbirdə rayon rəhbərliyi, ayrı-ayrı əmək kollektivlərinin nümayəndələri, ağsaqqal və gənclər, ərazi bütövlüyümüz uğrunda canlarından keçmiş igid Vətən oğullarının məzarları üzərinə gül-çiçək düzüb, şəhidlərin ölməz xatirəsini ehtiramla yad ediblər.
Anım tədbiri Qax Rayon İcra Hakimiyyətinin başçısı Musa Şəkiliyev açaraq, 44 gün davam edən Vətən müharibəsində Müzəffər Ali Baş Komandanın rəhbərliyi ilə rəşadətli Azərbaycan ordusunun qazandığı tarixi Qələbədən, Zəfərlə başa çatan müharibədə Vətənimizin igid oğullarının göstərdikləri qəhrəmanlıqlardan danışıb. Ərazi bütövlüyümüz uğrunda başlanan savaşda Qax rayonunun igid oğullarının şücaətindən söz açılıb onların rəşadətlə vuruşduğu və şəhidlik zirvəsinə ucaldığı vurğulanıb. Çıxışının sonunda torpaqlarımızın işğaldan azad edilməsi uğrunda canlarından keçən şəhidlərimizin əziz xatirəsinin xalqımız tərəfindən daim uca tutulduğu qeyd olunub.
Tədbirdə Milli Məclisin deputatı Azər Kərimli, Səfərbərlik və Hərbi Xidmətə Çağırış üzrə Dövlət Xidmətinin Qax rayon şöbəsinin rəisi Fuad Hüseynov, şəhid Milli Qəhrəman Cavanşir Rəhimovun anası Lalə Rəhimova, Vətən müharibəsi qazisi Ramil Əsgərov, şəhid polkovnik Sadiq Məmmədovun həyat yoldaşı Pərvanə Məmmədova çıxış edərək, Vətən uğrunda canlarından keçən igid oğulların qanının yerdə qalmadığını, düşməndən amansız qisas alındığını və şəhidlərin ruhu qarşısında baş əydiklərini, hər zaman hörmət və ehtirama layiq olduqlarını bildiriblər.
Anım tədbiri ədəbi-bədii kompozisiya ilə başa çatdıqdan sonra “Şəhidlər xiyabanı”nda, həmçinin rayonun digər ərazilərində şəhidlərin xatirəsinə həsr olunmuş ağacəkmə aksiyaları keçirilib.
Eyni zamanda rayonda fəaliyyət göstərən məscid və kilsələrdə Anım Gününə həsr olunmuş dini mərasimlər keçirilmiş, mərasimlərdə şəhidlərin ruhuna dualar oxunmuş, xatirəsinə şamlar yandırılmışdır.