Rayonda şəhid hərbi qulluqçu Emil Fətəliyevin xatirəsi anılıb
Vətən müharibəsində Azərbaycanın ərazi bütövlüyü uğrunda gedən döyüşlərdə şəhid olmuş Daxili İşlər Nazirliyinin Daxili Qoşunların hərbi qulluqçusu, baş çavuş Emil Fətəliyevin il mərasimi keçirilmişdir.
Rayonunun Qorağan kəndində keçirilən anım mərasimində Daxili İşlər Nazirliyinin, Rayon İcra Hakimiyyətinin nümayəndələri, şəhidin ailə üzvləri, döyüş yoldaşları və ictimaiyyət nümayəndələri iştirak etmişlər.
Əvvəlcə Emil Fətəliyevin məzarı üzərinə gül dəstələri düzülmüş, ruhuna dualar oxunmuş, xatirəsi ehtiramla yad edilmişdir.Çıxış edənlər şəhidin Vətən müharibəsindəki şücaətindən, onun şərəfli döyüş yolundan söz açmışlar.
Zəngilan istiqamətində gedən döyüşlərdə şəhidlik zirvəsinə ucalan Emil Fətəliyev Azərbaycan Respublikası Prezidentinin müvafiq sərəncamları ilə ölümündən sonra “Vətən uğrunda”, “Füzulinin azad olunmasına görə”, “Şuşanın azad olunmasına görə”, “Cəbrayılın azad olunmasına görə” və “Kəlbəcərin azad olunmasına görə” medalları ilə təltif edilmişdir.