İyunun 4-də Qax Rayon İcra Hakimiyyətinin başçısı Musa Şəkiliyevin rayonun Lələli kəndində əhali ilə görüşü keçirilmişdir.
Səyyar qəbul xarakteri daşıyan görüşdə kəndl sakinləri ilə yanaşı, rayonun hüquq mühafizə orqanlarının, idarə, müəssisə və xidmət təşkilatlarının rəhbərləri iştirak etmişlər.
Zəyəm kənd inzibati ərazi dairəsi üzrə nümayəndənin müavini Müslüm Abdurahmanov sakinlərin məşğuliyyəti və kəndlərin sosial-iqtisadi inkişafı istiqamətində görülən işlər barədə məlumat vermiş, bir sıra sosialyönümlü problemləri diqqətə çatdırmışdır.
Görüşdə iştirak edən sakinlər – Qürbət Abdullayev,Arif Bayramov, Ramiz Şahmirov və digərləri suvarma mövsümündə kəndə suyun verilməsində növbələşdirilməni təşkil etmək, suvarma suyu verən Şotavar kanalının axıradək dərinləşdirilməsi, ağır tonnajlı maşınların işləməsi üçün kəndin kənarı ilə alternativ yolun çəkilməsi ilə bağlı müraciət etmişlər.
İcra Hakimiyyətinin başçısı kənd sakinlərini diqqətlə dinlədikdən sonra bildirmişdir ki, Prezident İlham Əliyevin tapşırığına əsasən keçirilən bu görüşlər zamanı mövcud problemlər yerində öyrənilir və lazımi tədbirlər görülür. Əhali tərəfindən qaldırılan məsələlərin, müraciətlərin operativ həlli təmin olunur, irəli sürülən təkliflər nəzərə alınır. Bu dəfə də belə olacaqdır.
Görüşdə sakinləri narahat edən məsələlərin həllini tapması üçün müvafiq strukturların rəhbərlərinə konkret tapşırıqlar verilmişdir.