5 oktyabr – Beynəlxalq Müəllim Günü münasibətilə tədbir keçirilmişdir

5 oktyabr – Beynəlxalq Müəllim Günü münasibətilə keçirilən ümumrayon tədbirinin iştirakçıları əvvəlcə ümummilli lider Heydər Əliyevin şəhərin mərkəzində ucaldılmış abidəsi önünə gül-çiçək düzüb, xatirəsini ehtiramla yad etmişlər.
Rayon rəhbərliyinin, qabaqcıl təhsil işçilərinin, ziyalıların iştirak etdikləri tədbirdə ölkəmizdə təhsil sahəsinin inkişafına göstərilən yüksək dövlət qayğısından danışılmış, təhsil işçilərinin qazandıqları uğurlardan ətraflı bəhs edilmişdir. Qeyd olunmuşdur ki, 1966-cı ildə UNESCO tərəfindən təsis edilən Beynəlxalq Müəllimlər Günü 1993-cü ildən Azərbaycanda da geniş qeyd olunur.
Azərbaycan Prezidentinin müvafiq sərəncamları ilə hər il “Ən yaxşı ümumtəhsil məktəbi” və “Ən yaxşı müəllim” müsabiqələrinin keçirilməsi, qaliblərin mükafatlandırılması məktəb kollektivləri tərəfindən böyük ruh yüksəkliyi ilə qarşılanır, təlim-tərbiyə işinin daha da yaxşılaşmasına öz töhfəsini verir.
Diqqətə çatdırılmışdır ki, son illər rayonun 5 ümumtəhsil məktəbi və 4 müəllim respublika müsabiqəsinin qalibi adını qazanmışdır. Bundan əlavə, rayonun 6 təhsil işçisi “Əməkdar Müəllim” adına layiq görülüb, 5 müəllim isə “Tərəqqi” medalı ilə təltif olunub. Sevindirici haldır ki, Azərbaycan Prezidentinin imzaladığı son sərəncamla şəhərdəki 2 və 4 nömrəli tam orta məktəblərin müəllimləri Gülbəniz Seyidova və Şirin Mahmudova “Əməkdar Müəllim” adına layiq görülüb, uşaq yaradıcılıq mərkəzinin direktoru Elina Əliyeva isə “Tərəqqi” medalı ilə təltif olunmuşdur.