“Beynəlxalq Ailə günü” qeyd olunmuşdur
BMT-nin Baş Assambleyasının 20 sentyabr 1993-cü il qətnaməsinə müvafiq olaraq hər il 15 may tarixi bütün dünyada “Beynəlxalq Ailə günü” kimi qeyd olunur.
Beynəlxalq Ailə gününün keçirilməsinin əsas məqsədi cəmiyyətin diqqətinin ailə məsələlərinə yönəldilməsi, ailə dəyərlərinin qorunub saxlanılaraq gələcək nəsillərə ötürülməsi, gənclərin ailə həyatına hazırlığı, milli azlıqları təmsil edən ailələrin adət-ənənələrinin nümayişi, ailədə sülh və dözümlülük mədəniyyətinin, sağlam həyat tərzinin, nümunəvi çoxuşaqlı ailələrin, sağlamlıq imkanları məhdud olan insanların cəmiyyətə inteqrasiyasının təbliğidir.
Rayonda da hər il təntənəli surətdə “Ailə bayramı” qeyd olunur. 15 may tarixdə “Park Kafe”-də gənc ailələrin, ağsaqqal və ağbirçəklərin, ziyalıların iştirak etdiyi tədbirdə Azərbaycanda cəmiyyətin özəyi sayılan ailəyə həmişə böyük önəm verildiyindən, dövlətimiz tərəfindən ailələrə göstərilən diqqət və qayğıdan, cəmiyyətin formalaşmasında və saflaşmasında ailənin mühüm rol oynadığından və ölkəmizdə ailə dəyərlərinin qorunub saxlanılmasından geniş söhbət açılmışdır.
Qax şəhərindən 53 il birgə ömür sürmüş Abbasovlar, İlisu kəndindən 50 ildən artıq birgə yaşamış Həsənovlar, Qum kəndindən 42 il birgə ömür sürmüş Yusifovlar ailələrinin üzvləri çıxış edərək, gənc ailələrə öz dəyərli məsləhət və tövsiyələrini bildirmişlər.
Tədbirin sonunda yaşlı və gənc ailələrə rayon İcra Hakimiyyəti adından hədiyyələr verilmişdir.