Rayonumuzda Dünya Azərbaycanlılarının Həmrəylik Günü və Yeni il bayramı qeyd olunub
Respublikamızın hər bir guşəsində olduğu kimi, rayonumuzda da 31 Dekabr – Dünya Azərbaycanlılarının Həmrəylik Günü və Yeni il bayramı böyük sevinc və ruh yüksəkliyi ilə qeyd olunub. Əlamətdar bayramlar münasibətilə dekabrın 29-da şəhərin mərkəzindəki meydanda ümumrayon şənliyi keçirilib.
Bayramsayağı bəzədilən meydanın mərkəzində qurulan hündür küknar ağacının ətrafında keçirilən tədbirdə RİH-in başçısı Musa Şəkiliyev yola saldığımız 2015-ci ilin ölkəmiz, həmçinin rayonumuz üçün bir çox əlamətdar hadisələrlə yadda qaldığını vurğulayaraq rayon ictimaiyyətini təbrik etmişdir.
Yeni ilin personajları Şaxta baba ilə Qar qızının meydana gəlişi bayram iştirakçılarının, xüsusilə uşaqların böyük sevincinə səbəb olub. Şaxta baba və Qar qızı şənlik iştirakçılarına Yeni il arzularını çatdırıb, uşaqları bayram hədiyyələri ilə sevindiriblər.
Bayram şənliyi rayonun musiqi və rəqs kollektivlərinin konserti və respublikanın tanınmış incəsənət xadimlərinin proqramı ilə başa çatmışdır.
