Torpaq çərşənbəsi qeyd olundu
Ölkəmizdə baharın nəfəsi yavaş-yavaş duyulmağa başlayıb. Yazın gəlişinə işarə edən Novruz çərşənbələrinin üçünü - Su, Od, və Yeli artıq ötən həftələrdə geridə qoymuşuq. Dünən isə çərşənbələrin sonuncusu İlaxır çərşənbə-Torpaq çərşənbəsi idi.
Bu çərşənbədə torpaq öz qarını, buzunu əridib toxumunu cücərdir. Ağaclar yuxudan oyanaraq tumurcuqlanmağa başlayır, bağ-bostan, dirrik yerləri əkinə hazırlanır. Axır çərşənbədə tonqal qalanması, plov dəmlənməsi, qapı pusma, şam yandırma, fala baxma və bir çox adət-ənənələr var.
Martın 15-də rayonun Mərkəzi meydanında sonuncu-torpaq çərşənbəsi də təntənəli şəkildə qeyd olundu. İdarə və təşkilat kollektivlərinin, ictimaiyyətin nümayəndələrinin iştirakı ilə keçirilən tədbirdə rayonun bədii özfəaliyyət kollektivləri rəngarəng konsert proqramı ilə çıxış edərək şənlik iştirakçılarına xoş ovqat bəxş etdilər.
Novruzun rəmzi olan tonqalın ətrafında yallı gedən uşaqlar bu bayramın dostluq, barış, mehribanlıq rəmzi olduğunu hər kəsə nümaiş etdirdilər.
