Qaxda 20 Yanvar faciəsi qurbanlarının xatirəsi anılmışdır

Azərbaycan xalqının qan yaddaşına əbədi həkk olunmuş 20 Yanvar faciəsinin iyirmi üçüncü ildönümü Qax rayonunda xalqımızın qəhrəmanlıq salnaməsi günü kimi qeyd olunur.
Rayonun müəssisə və təşkilatlarında, ümumtəhsil məktəblərində, mədəniyyət ocaqlarında anma mərasimləri, konfranslar, ədəbi-bədii gecələr, inşa yazı və rəsm müsabiqələri keçirilir, sərgilər, guşələr təşkil olunur.
Faciənin ildönümü ilə əlaqədar yanvarın 18-də Qax şəhərində ümumrayon tədbiri keçirilmişdir.
Rayon ictimaiyyətinin nümayəndələri əvvəlcə Qax şəhərindəki Şəhidlər xiyabanına gələrək 20 Yanvar şəhidlərinin xatirəsinə ucaldılmış abidənin önünə gül-çiçək düzmüş, Vətənimizin azadlığı və müstəqilliyi yolunda həlak olanların xatirəsini ehtiramla yad etmişlər.
Qax Rayon İcra Hakimiyyətində keçirilən “20 Yanvar qan yaddaşımızdır” mövzusunda “dəyirmi masa”nın iştirakçıları foyedə məktəblilərin “Qanlı Yanvar” mövzusunda çəkdikləri rəsm əsərlərindən ibarət sərgi ilə tanış olmuşlar.
Tədbirdə çıxış edənlər 20 Yanvar hadisələrinin mahiyyəti, onu doğuran səbəblər, faciənin acı nəticələri barədə danışmış, bu qanlı qırğının xalqımızın azadlıq mübarizəsi tarixində şanlı səhifə olduğunu xüsusi vurğulamışlar.
Qeyd olunmuşdur ki, 1990-cı ilin 20 yanvar gecəsində Azərbaycan xalqı özünün yenilməzliyini, qəhrəmanlığını, Vətənə, torpağa sədaqətini, azadlıq uğrunda mübarizə əzmini bir daha bütün dünyaya bəyan etmişdir. Natiqlər hadisələrə hüquqi-siyasi qiymət verilməsində, cinayətkarların adının xalqa bəyan edilməsində ümummilli liderimiz Heydər Əliyevin tarixi xidmətlərini önə çəkmiş, hazırda 20 Yanvar şəhidlərinin ailələrinə dövlətimiz tərəfindən yüksək diqqət və qayğı göstərildiyini bildirmişlər.