8 Noyabr- Zəfər Günü münasibəti ilə rayonda silsilə tədbirlər keçirilmişdir.
Xalqımız 30 ilə yaxın gözlədiyi Qələbənin sevincini yaşayır. Üç ildir bayramlarımız sırasına daha bir möhtəşəm tarixi gün əlavə olunub – 8 Noyabr -Zəfər Günü. Müzəffər Ali Baş Komandan, cənab Prezident İlham Əliyevin rəhbərliyi ilə qazanılan zəfərimiz dövlətimizin və xalqımızın yenilməzliyinin, məğrurluğunun dünyaya təqdimatıdır. Bir daha sübut olundu ki, tarixi ədalətə, real faktlara əsaslanan siyasət qalib olur. Xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə Cənab Prezident, Ali Baş Komandan İlham Əliyevin 3 dekabr 2020-ci il tarixli Sərəncamı ilə 8 noyabr ölkəmizdə Zəfər Günü kimi təsis edildi.
Tariximizin ən parlaq səhifəsi, Azərbaycan xalqının iftixar və qürur mənbəyi olan 8 Noyabr - Zəfər Günü rayonumuzda da böyük qürurla qeyd olunur.
“8 Noyabr –Zəfər Günü” münasibəti ilə təsdiq olunmuş rayonun tədbirlər planına əsasən İnzibati Ərazi Dairəsi üzrə nümayəndəliklərdə, təhsil, mədəniyyət və digər müəssisə, təşkilatlarda Zəfər gününə həsr olunmuş silsilə tədbirlər keçirilmiş, Vətən müharibəsi şəhidlərinin ailələri ziyarət olunmuşdur.
