Rayonda tam təhsil səviyyəsi üzrə buraxılış imtahanları keçirilib

 Martın 5-də ölkənin 15 şəhər və rayonunda, o cümlədən  rayonumuzda Dövlət İmtahan Mərkəzi tərəfindən tam (11 illik) orta təhsil səviyyəsi üzrə buraxılış imtahanları keçirilib. İmtahanlar şəhərin 2 və 5 saylı tam orta məktəbində təşkil olunub. Pandemiya dövrünün tələblərinə uyğun olaraq imtahan mərkəzlərində əvvəlcədən zəruri profilaktik tədbirlər görülüb, binalarda və zallarda dezinfeksiya işləri aparılıb. Kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib.
  Buraxılış imtahanında 418 nəfər şagird iştirak edib. Onlardan 341 nəfəri tədrisi Azərbaycan, 17 nəfəri tədrisi rus, 60 nəfəri isə tədrisi gürcü dilində olan məktəblərin şagirdləridir. İmtahana başlamazdan əvvəl binaya daxil olan iştirakçıların məsafədən ölçən elektron termometrlə hərarətləri yoxlanılıb. İştirakçılar bütün proses boyu tibbi maskadan istifadə ediblər. İmtahan otaqlarında iştirakçıların sayı sosial məsafə prinsiplərinə uyğun şəkildə tənzimlənib, imtahan heyəti müvafiq qoruyucu vasitələrlə təmin olunub. Hər iki imtahan mərkəzində buraxılış imtahanları mövcud təlimata uyğun şəkildə aparılıb və heç bir qanun pozuntusuna yol verilməyib. Buraxılış imtahanı Azərbaycan, rus və gürcü bölmələri üzrə aparılıb.