Həftə ərzində Vətən müharibəsində şəhidlik zirvəsinə ucalan rayonumuzun mərd oğullarının anım mərasimi keçirilmişdir
Rayonda torpaqlarımızın işğaldan azad edilməsi uğrunda gedən Vətən müharibəsində qəhrəmancasına döyüşərək şəhidlik zirvəsinə ucalan igid oğullarımızın doğum və anım günlərində onların xatirələrinin anılması, ailələrinin ziyarət olunması artıq ənənə halını almışdır.
Aprel ayının 23-də şəhid Abdullayev Cavid Vahid oğlunun, aprelin 26-da isə Məhərrəmov Şamo Mətləb oğlunun doğum günlərində xatirələri anılıb.
Bu münasibətlə təşkil olunan anım mərasimlərində rayonun və hüquq-mühafizə orqanlarının rəhbərləri, şəhidlərin ailə üzvləri, ictimaiyyət nümayəndələri, gənclər, məktəblilər iştirak etmişlər. Şəhidlərin məzarları üzərinə gül dəstələri düzülmüş, ruhlarına dualar oxunmuş, xatirələri ehtiramla yad edilmişdir.
Tədbirlərdə şəhidlərin Vətən müharibəsindəki şücaətlərindən, onların şərəfli döyüş yollarından söz açılmış, məktəblilər və gənclər bədii kompazisiyalarla çıxış etmişdir.
Şəhid Cavid Abdullayev rayonun Qaşqaçay kəndində anadan olub. Azərbaycanın ərazi bütövlüyünün təmin edilməsi uğrunda müharibənin ilk günlərindən döyüşlərə qatılan Cavid oktyabrın 21-də Fizuli şəhəri istiqamətində gedən döyüşlərdə şəhid olub. Ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib.
Şəhid Şamo Məhərrəmov rayonun Ləkit kəndində doğulub. 44 günlük Vətən müharibəsinə könüllü olaraq qatılan Şamo noyabrın 7-də Şuşa döyüşlərində şəhid olub. Ölümündən sonra “Cəsur döyüşçü”, “Vətən uğrundə” və “Şuşanın azad olunmasına görə” medalları ilə təltif olunub.
Ərazi bütövlüyümüzün bərpa olunması uğrunda canından keçmiş bütün şəhidlərimizə Allahdan rəhmət, qazilərimizə isə şəfa diləyirik!